විවෘත කිරීමේ උත්සවට මධ්‍යම පළාත් මහ ඇමති සරත් ඒකනායක, මධ්‍යම පළාත් අමාත්‍ය ප්‍රමිත තෙන්නකෝන්, ශ්‍රී ලංකා සංචාරක සංවර්ධන අධිකාරියේ සභාපති භාෂ්වර ගුණරත්න, අලියා හෝටලයේ සභාපති චන්ද්‍රා වික්‍රමසිංහ සහ දඹුල්ල ප්‍රදේශීය සභාවේ සභාපති කේ.ඩී. සෝමතිලක යන මහත්වරුන් ඇතුළු ඇතුළු ආරාධිතයන් විශාල පිරිසක් සහභාගී වූහ. සංචාරක ව්‍යාපාරය රටේ සෑම ජනතාවගේ දියුණුව ඉලක්කකර ගනිමින් සංවර්ධනය කිරීම රජයේ අරමුණ බවද ප්‍රධාන වශයෙන් සංචාරක ව්‍යාපාරය මගින් සංවර්ධනය වෙමින් පවතින රටවල් බොහොමයක් තම රටේ දිළිදුබව තුරන් කිරීම සදහා සංචාරක ව්‍යාපාරය යොදා ගන්නා බවද ආර්ථික සංවර්ධන අමාත්‍ය බැසිල් රාජපක්ෂ මහතා එහිදී පැවසීය.
මෙහිදී වැඩිදුරටත් අදහස් දක්වමින් අමාත්‍ය රාජපක්ෂ මහතා කියා සිටියේ කුඩා, මධ්‍යම සහ විශාල ප්‍රමාණයේ හෝටල් විශාල සංඛ්‍යාවක් ඉදිවීම තුළින් සංචාරක ව්‍යාපාරයේ විශාලතම අභියෝගයක් ජයගැනීමට පෞද්ගලික අංශයේ සහාය ඇතිව රජයට හැකිවූ බවය. මහින්ද රාජපක්ෂ ජනාධිපතිතුමාගේ මඟ පෙන්වීම සහ බැසිල් රාජපක්ෂ අමාත්‍යවරයාගේ මෙහෙයවීමෙන් සංචාරක කේෂේත්‍රයේ පස් වසරක මූලික සැලසුම් මෙම ජයග්‍රහනයන්ට හේතුවූ බව අලියා හෝටලයේ සභාපති චන්ද්‍රා වික්‍රමසිංහ මහතා එහිදී පැවසීය. අක්කර 20ක භූමියක ඉදිකර ඇති අලියා හෝටලය මගින් ප්‍රදේශයේ ජනතාවට සෘජු රැකියා 220ක් සහ වක්‍ර රැකියා 500කට ආසන්න සංඛ්‍යාවක් හිමිවනු ඇත. මඩකලපුවේ පාසිකුඩා සංචාරක සංවර්ධන කලාපයේ ඉදිකරන ලද ප්‍රථම හෝටලය වූ මාළු මාළු හෝටල් සමාගමේද සභාපතිවරයා වන්නේ චන්ද්‍රා වික්‍රමසිංහ මහතාය. පරිසර හිතකාමි ලෙස විදේශීය සංචාරකයින්ගේ සුවිශේෂි ආකර්ෂණය දිනා ගැනීමට හැකිවන පරිදි ඉදිකර ඇති සීගිරියේ අලියා හෝටලයේ සිට යුනෙස්කෝ ලෝක උරුමයක්වූ සීගිරිය සහ පිදුරන්ගලට කිලෝ මීටර් 07ක් වන අතර හෝටලයට එම ස්ථානයන් දර්ශනීය ලෙස දිස්වේ.සියළුම පහසුකම්වලින් සමන්විත තරු හතරේ හෝටලයක් වන අලියා හෝටලයේ පැරණි වගා උපකරණ සහ සම්ප්‍රදායන් පිළිබදව දැනුම ලබාදෙන ගොවි කෞතුකාගාරයකින්ද සමන්විතය. වසර 2016වන විට සංචාරකයින් ලක්ෂ 25ක ප්‍රමාණයක් මෙරටට ආකර්ෂණීය කර ගැනීමේ රජයේ වැඩසටහන යටතේ අපේක්ෂිත ඉලක්කයන් ඉක්මවමින් පවතින අතර වසර 2013දී මෙරටට පැමිණි සංචාරකයන් සංඛ්‍යාව 1,274,593කි. ඉතිහාසයේ වැඩිම සංචාරකයින් පිරිසක් ශ්‍රී ලංකාවට පැමිණි ඉකුත් 2013 රටට ලැබුණු ආදායම ඇමරිකන් ඩොලර් බිලියන 1.45කි. එම කාලය තුළ සංචාරක ආර්ථිකය මගින් සෘජු රැකියා 112,550ක් සහ වක්‍ර රැකියා 157,600ක් බිහිවිය. එමෙන්ම එම වසරේදී නව හෝටල් 43ක් සංචාරක කේෂේත්‍රයට එක්වූ අතර සංචාරක කර්මාන්තය හරහා රටේ සියළු ජනතාවට ප්‍රතිලාභය ලබාදීම රජයේ අරමුණ වී තිබේ.
Source : Ministry of Economic Development
